Sögur af Mjaðarvöllum

Í byrjun maí er væntanlegur til hingað til München bjór- og óperuaðdáandi frá Íslandi í menningarferð.

Fyrirhugað er að sjá tvö meistarastykki í Bayerische Staatsoper. Annars vegar er það Der fliegende Holländer eftir eftir meistara Wagner og hins vegar er það Der Rosenkavalier eftir stórskáldið Strauss.

Vegna mikils hamagangs og hávaða í miða innkaupum hjá mér, keypti ég einum miða of mikið á stórsýninguna Der Rosenkavalier þann 6. maí næstkomandi.
Býð ég því lesendum þessarar síðu að kaupa þennan auka miða af mér á gjafaverði. Hér er um að ræða einstakt tækifæri til þess að sjá þessa léttu og skemmtilegu sýningu í frábæru óperuhúsi. Sætin eru á besta stað, 1. Ring link, Türe 3, enda voru þau pöntuð fyrir mörgum mörgum mánuðum.

Innifalið í miðanum er:

• Freyðivín og Bjór á Schellingstrasse 105 fyrir sýningu þar sem Sérfræðingurinn fer yfir söguþráðin og helstu persónur verða kynntar til leiks. Valin atriði verða sýnd í DVD gæðum.
• Miðaeigandi nýtur sérfræðiþekkingar Sérfræðingsins meðan á sýningu stendur og getur ávallt fengið útskýringar á flóknum atriðum.
• Eftir sýningu býðst hinum heppna miðaeiganda að koma með á Bæverska knæpu, snæða þar svínahaxa (með súrkáli) og drekka bjór.

Áhugasamir sendi mér tölvupóst með tilboði í þennan miða.

Sit hér og horfi á það besta sem þýskt sjónvarp býður uppá http://www.daserste.de/himmelswillen/. Í aðalhlutverki er auðvitað enginn annar en hinn fyrrum hundtryggi aðstoðarmaður Stephans Derricks, Fritz Wepper, en nú í hlutverki borgarstjórans Wolfgang Wöllers. Þættir þessir eru alla þriðjudaga kl. 20:15. Á meðan þagnar borgin, því allir eru að horfa.

Fritz hefur einmitt lengi verið minn uppáhalds leikari. Tæplega 300 Derrick segja sína sögu, þar sýndi hann oft stórkostlega takta undir dyggri stjórn Derricks. Hver man t.d. ekki eftir þegar hann svaraði í símann og rétti Derrick svo símtólið af því síminn var alltaf til hans. Það voru öll þessi smáu atriði sem gerðu leik hans eitthvað betri en hjá öllum öðrum. Það er því virkilega gaman að sjá Fritz aftur á skjánum. Ekki þarf að minnast á að hann hefur ekki elst um dag, hann er í líkama tvítugs manns, en með huga og reynslu öldungs.

Skrýtið að þessir þættir séu ekki sýndir í íslensku sjónvarpi á föstudögum kl. 21:00. Þá gæti nú Idolið, X-Factor og hvað þessir þættir heita farið að vara sig.